إن دبل الورد...

 

اللى ف الصورة دى صحبتى سها..النهاردة هحكيلكو انا اتعرفت عليها ازاى..ف يوم كنت بتمشى لوحدى ف جنينة وإذ فجأةً اسمع صوت عياط..بصيت حواليا ملقيتش ناس خالص..ركزت شوية كده ف الصوت عشان اعرف جاى منين ودى كانت أول مرة اشوف فيها سها اتعرفنا على بعض وقعدت ادردش معاها شوية يمكن تبطل عياط..هيا حالتها كانت وحشة أوى الصراحة..لدرجة انها فكرت تضرب عن المايه والسماد أو حتى تقطع جذورها عشان تنتحر استغفر الله العظيم هيا كانت شايفة انها مش جميلة..بس الحقيقة انها كانت جميلة بس دبلانة..المهم لما اتكلمنا عرفت منها إنها كانت متعودة إن عم محمود الجناينى بييجى يسقيها كل يوم..بس عم محمود غاب عنها فترة كبيرة لا حس ولا خبر!..وبعدين عِرِفِت من ولاده ان هوا تعب جامد ومعدش يقدر يجيلها زى الأول..ومن ساعتها وهيا ع الحالة اللى انتوا شايفينها ف الصورة دى .....
أنا حاولت اطيب خاطرها بكلمتين بس in vain..شوية كده وطلبت منى انى آخدها م الجنينة دى واحطها ف قصيص عندى ف بلاكونة بيتى..طبعا هيا مكانتش عارفة ان بيتنا مفيهوش بلاكونة أصلا =D آنى واى حاولت افهمها ان ده مش الحل..وإنى زي عم محمود بالظبط لو اهتميت بيها النهاردة مش ههتم بيها بكرة..وهنا بقا اضطريت اواجهها بالحقيقة..قولتلها "نو مور عم محمود!!"..ان هيا لازم تكون عم محمود نفسها..لازم تبتدى تهتم بنفسها وانها لو معملتش كده هتفضل دبلانة كده على طول ومش بعيد تموت..وبعد شوية عياط تانيين م الصدمة دى ابتدت سها تهدى..وابتديت اعلمها ازاى تشرب م النافورة بدل ما تستنى حد يسقيها..وكمان دليتها على دكان عم محمد العطار عشان تبقى تشترى من هناك سماد لما يخلص السماد اللى عندها ف التلاجة..وخدتلها الصورة دى..هيا كانت مش موافقة انى انزلها ع الفيس بس انا اقنعتها بعد ما قولتها انى هبقى انزلها بعدين بيفور آند أفتر فوتو .....
من مئات السنين ف الصين تم صنع تمثال ضخم لبوذا من الدهب الخالص على يد الرهبان السياميين..وبعد فترة الرهبان سمعوا إن جيش بورما بيستعد لغزو مدينتهم..فقاموا غطوا التمثال بالطين تماما عشان لما الغزاة يوصلوا يفتكروه مجرد تمثال طين فمحدش يسرقه..للأسف جيش بورما لما وصل قتل كل الرهبان وفعلا مهتموش بالتمثال..وبكده اندفن سر التمثال مع الرهبان اللى اتقتلوا ف معبدهم..و ف سنة 1957 وأثناء ترميم المعبد اكتشفوا بالصدفة البحته ان التمثال الضخم اللى محدش كان مديله أهمية ده عبارة عن تمثال دهب وان الطين ده كان مجرد طبقة من بره للتمويه.....
الدنيا هتغطيك بالطين وانت ماشي فيها..ولو مشيلتش الطين ده من عليك ولمعت تمثالك كل شوية هتندفن جوه طينك..وهينطفى لمعانك..وهتنسى أصلا انت وكل اللى حواليك ان انت كنت بتلمع ف يوم من الأيام..هتنسى نفسك.....
مفيش حد هياخد باله منك طول العمر..آه فيه ناس بتلعب دور كبير ف حياتنا ف أوقات معينة..زى الأب والأم مثلا..بس حتى دول ليهم فترة معينة..مرحلة وبتنتهى..وبتبدى تتفطم وتواجه الدنيا لوحدك..مفيش حد بيفضل يرضع طول العمر..آه بس القاعدة دى بنطبقها ع اللبن بس..لكن فيه ناس بتفضل ترضع اهتمام طول عمرها لحد ما الحياة تفطمها بطريقتها بقا..خد بالك واهتم بنفسك من دلوقتى قبل ما عم محمود يغيب ويمرض..لإن ساعتها هتحتاس لوحدك..اهتمامك بنفسك هوا رسالتك الغير مكتوبة لنفسك انك بتحبها..وهيا تسحتق الحب أكتر من أى حد تانى..لإنك ببساطة لو محبيتهاش مش هتعرف تحب أى حد تانى..وفاقد الشئ لا يعطيه.....
#U_R_Beautiful
#U_Just_Need_To_Take_Care
#No_More_3am_Mahmoud