أنا عارفة انى زهقتكو معايا بالأساطير اليونانية..عشان كده قررت اعمل حاجة مختلفة النهاردة..هحكيلكو اسطورة يهودية
.....الأسطورة بتدور أحداثها ف العاصمة التشيكية براغ Prague ف القرن ال16 لما المدينة كانت بتتعرض لهجمات من أعداء السامية..ساعتها قرر الحاخام لوف Rabbi Loew انه يتصرف..فصنع تمثال ضخم من الطين وأحياه..وهنا اتولد كائن الجولم Golem واللى كانت ليه قوة خارقة قدر بيها يحمى اليهود من أعدائهم..المشكلة بتبدأ لما الجولم فيل ان لاف..بس واضح ان البنت اللى هوا حبها حطته ف الفريندزون (أو ال monster zone بمعنى أصح
)..فقام جولم زعل أوى واتحول من حارس المدينة لعدوها الأشرس..وهنا اضطر الحاخام انه يدمره زى ما صنعه 
.....أحمد وعلياء كابل جديد..أحمد نموذج للشاب المحترم وكل البنات أخواته على رأى الفنانة جنات
..بس علياء عندها مشكلة رهيبة..مبتبطلش فرجة ع الأفلام العربى
القديمة..فبقت عادة شبه يومية ليها انها تشم هدوم أحمد وتقوله "إيه ريحة
البارفان الغريبة دى؟!" بغض النظر عن ان الريحة الغريبة بتكون ريحة عرق مش
بارفان ..ده غير انها دايماً بتفتش ف موبايله كمحاولة بائسة انها تثبت خيانة
وهمية مش موجودة إلا ف خيالها..أحمد بعد تلات سنين من جوازهم بيتلاقى نفسه
بيضعف قدام جارتهم سحر واللى كانت بتراوده عن نفسه من أكتر من خمس سنين قبل
جوازه وكان دايماً بيصدها!!.....سامح وشرين بقا دول الكابل اللى ف الشقة اللى قدامهم..سامح كان مقضيها قبل شرين..كان بيعرف بنات أكتر من شعر راسه بس شرين متعرفش عنه كده..شرين كانت بتثق فيه ثقة عمياء..وكانت دايماً بتحسسه بده وبتديله حرية يتحرك بعيد عنها..كانت دايماً بتقوله انها معندهاش ذرة شك ف إخلاصه ليها..سامح بيتلاقى نفسه بيتغير..بيقطع علاقته بأى واحدة تانية وبيحاول يكون على قد ثقة شرين فيه بطريقة لا إرادية..سامح ممكن انه كان انسان مش كويس بس مع شرين هوا حد تانى غير السامح اللى كان يعرفه!!.....
بيقولك ان توماس اديسون اضطرد م المدرسة وهوا صغير لإنه غبى ومش نافع ف التعليم..لكن أمه قررت تعلمه ف البيت وكانت بتقوله كل يوم "أنت أذكى رجل ف العالم
"..وكانت النتيجة انه قدر ينور دنيتنا بأكتر من ألف اختراع..على النقيض
تقف الأم المصرية الشامخة بكلمتها الخالدة "أبقى قابلنى لو فلحت" وكانت
النتيجة.....بلاش اتكلم 
..... نرجع لأسطورتنا..علماء النفس استوحوا م الأسطورة مصطلح تأثير جولم Golem effect واللى بيقول ان ال low expectations بتأدى ل lower performance..زى ما ف الأسطورة الحاخام توقع من الجولم انه يكون قوى ومدمر فكان هيدمره ف الآخر بقوته دى..وعكس الكلام ده هوا تأثير بجماليون Pygmalion effect..اللى فيه ال high expectations بتأدى ل higher performance..زى ما ف الأسطورة بجماليون توقع ان تمثاله يكون اجمل من أى امرأة ف العالم وده اللى حصل..بتأثير جولم وتأثير بجماليون نقدر نفسر الأمثلة اللى فوق دى وغيرها كتير.....
الكلام ده مش بس بينطبق ع العلاقات بين الناس..لأ ده كمان نقدر نطبقه على علاقة الإنسان بنفسه وعلاقته بربنا..وده اللى بنشوفه ف الحديث القدسى "أنا عند ظن عبدى بى فليظن بى ما شاء".....
#Its_up_to_u
#Lets_have_some_faith
تعليقات
إرسال تعليق